Doughnut - ඩෝනට්

අවශ්‍ය ද්‍රව්‍ය 

• පිටි කෝප්ප 2
• සීනි මේස හැඳි 4
• බිත්තර  1
• දියකරගත් බටර් මේස හැඳි  4
• කිරි කෝප්ප 1/2
• යීස්ට් තේ හැඳි 1
• බේකින් පවුඩර් තේ හැඳි 1

මද උණුසුම්  කිරි එකට යීස්ට් හා සීනි එක්කර දිය කරගෙන පැත්තකින් තියන්න.

බිත්තරය කඩා වියලි බඳුනකට එක් කර ගන්න. කහමද සුදුමද එක් වන ලෙස හොඳින් ගසා ගන්න. ඉතිරි සීනි හා දියකරගත් බටර් එක් කරගෙන සියල්ල හොඳින් ගසා ගන්න. එයට කලින් සකස් කර ගත් යීස්ට් මිශ්‍රණය  එක් කරන්න. (යීස්ට් පෙණ මතුකරමින් සක්‍රීය වී තිබිය යුතුයි)

පිටි ටිකට බේකින් පවුඩර් එක් කර හලා ගන්න. මිශ්‍රණයට පිටි සෙමින් එක් කරගෙන සියල්ල හොඳින් කලවම් කරගන්න. ඩෝ එකක් සැකසුනු පසු එය පිටි ඉස ගත් මතුපිටකට ගෙන හොඳින් අනා ගන්න. එක් අතක අල්ලාගනිමින් අනෙක් අතේ අල්ලෙන් ඉදිරියට තල්ලු කර ඩෝ එක ඇදෙන ලෙස කරකවමින් අනා ගන්න. ඉතා මෘදු ඩෝ එකක් බැවින් පහසුවෙන් අනා ගත හැකියි. ඩෝ එක අතේ නොඇලෙන පදමට පැමිණි විටරම රවුමට සකස්කර මතු තෙල් ස්වල්පයක් තවරා, තෙල් ආලේප කරගත් බෝල් එකක දමා රෙද්දකින් වසා උණුසුම් ස්ථානයක තබන්න.

ඩෝ එක ආසන්න ලෙස දෙගුණයක් වූ පසු එහි වාතය ඉවත් කර (ඇඟිලි වලින් තදකිරීමෙන්) නැවත විනාඩියක් පමණ අනා රෝලින් පින් එකක් ආධාරයෙන් තුනී කර ගන්න. මදක් ඝන ආකාරයෙන් තුනී කරගත් ඩෝ එක රවුම් උපකරණයක් ආධාරයෙන් රවුම් කපා ගන්න. කුඩා රවුමක් ආධාරයෙන් මැද රවුම කපා ඉවත්කර ගන්න. (ඩෝනට් කටර් එකක් ආධාරයෙන් කපාගත හැකියි.)

Toppings

1. Cinnamon Sugar
සීනි හා කුරුඳු එකට හොඳින් කුඩු කර ගන්න.

2. Chocolate
උණුසුම් කිරි ස්වල්පයකට අයිසින් සීනි, චොක්ලට් පවුඩර් එක් කර හොඳින් කලවම් කරගන්න. තරමක් උකු ලෙස සකස් කර ගන්න.

3. Sugar glaze
උණුසුම් කිරි ස්වල්පයකට අයිසින් සීනි එක් කර හොඳින් මිශ්‍ර කරගන්න. උකු මිශ්‍රණයක් සකස් කර ගන්න.

4. බටර් ක්‍රීම්
කිරි ස්වල්පයක්, බටර් හා අයිසින් එක් කර බටර් ක්‍රීම් සාදා ගන්න.

5. ඩැල්ගෝනා බටර් ක්‍රීම්
ක්ෂණික Coffee, සීනි හා වතුර එකට හොඳින් ගසා ගෙන ඝන මිශ්‍රණයක් සකස් කර ගන්න. ඉහත සකස් කල බටර් ක්‍රීම් මිශ්‍රණයට සකස් කරගත් කෝපි මිශ්‍රණය කලවම් කර ගන්න.

බැදගැනීම
ගැඹුරු තාච්චියක තෙල් මද ගින්නේ රත් කරගන්න. සාමාන්‍ය තරමට රත් වූ පසු ඩෝනට් එක බැඟින් තෙලට දමා බැද ගන්න. රන්වන් පැහැ වූ පසු අනෙක් පස හරවා දෙපැත්තම බැදගන්න.

කුරුඳු සීනි වල ඩෝනට් උණුවෙන්ම තවරා ගන්න.
බටර් ක්‍රීම් සඳහා ඩෝනට් එක මැදින් හරහට කපා ක්‍රීම් එක ආලේප කර ගන්න.

චොකලට් හා සීනි ද්‍රාවණය උඩින් වත්කරගන්න.

අයිසින් සීනි උඩින් ඉස ගැනීමද කල හැකියි.

තමන් කැමති ආකාරයෙන් ටොපින් එක් කර ඩෝනට් සරසා ගන්න. 

© kalSwijesooriya @ KC & Baby K

Fried rice with Vegetable Chop-suey, Devilled Chicken and Chilli Paste

● Fried Rice

අවශ්‍ය ද්‍රව්‍ය

•පිසගත් බත් (කීරි සම්බා/ බාස්මතී)
•කුඩාවට කපා ගත් කැරට්, ලීක්ස්, ගෝවා
•චොප් කරගත් ඉඟුරු,සුදුළූණු
•චිකන් ස්ටොක් හෝ දියකර ගත් චිකන් කියුබ් 1
•ලුණු •ගම්මිරිස්
•බිත්තර
•තෙල් මේස හැඳි 2/3

අඩිය නොඇලෙන පෑන් එකක් ලිප තබා, එයට තෙල් එක් කරගන්න.
තෙල් රත් වූ පසු ඉඟුරු, සුදුළූණු එක් කර රන්වන් පැහැ වන තුරු තබා එයට කැරට් එක් කරන්න. කැරට් යන්තම් තැම්බෙන විට, ගෝවා, ලීක්ස් එක් කර තෙල් වල තෙම්පරාදු වන්නට තබන්න.
එළවලු තැම්බෙන විට පෑන් එකේ මැද ට බිත්තර එක් කරන්න. හැන්දෙන් බිත්තරය කුඩා කෑලි වන ලෙස කඩමින් බිත්තර පිසගන්න. එළවලු සමඟ කලවම් කරගන්න.
එළවලු තෙම්පරාදු වූ පසු එයට චිකන් ස්ටොක් එකතු කරගන්න.
එය සිදීගිය පසු බත් ටික එකතු කරන්න.
රස අනුව ලුණු ගම්මිරිස් එක් කරගන්න.
ලිපේ ගින්දර වැඩි කර සියල්ලම එකට කලවම් කරමින් බත් එක ෆ්රයි කරගන්න. පුපුරන ශබ්දයෙන් බත් ඇට පිළිස්සෙන විට තෙත සම්පූර්ණයෙන් සිදෙන පරිදි හොඳින් කලවම් කරගන්න.

● වෙජිටබල් චොප්සි

අවශ්‍ය ද්‍රව්‍ය

•කැරට්
•අල
•බෝංචි
•ගෝවා
•ලොකු ළූණු
(අවශ්‍ය  නම් බේබි කෝන්, බට්න් මෂ්රූම්, බෙල් පේපර්)
•චොප් කරගත් ඉඟුරු,සුදුළූණු
•ලුණු
•ගම්මිරිස්
•දියකරගත් කොන් ෆ්ලා තේ හැන්දක්
•තෙල් මේස හැඳි 2/3
•සීනි ස්වල්පයක්

කැරට්, රවුම් හැඩයට තුනීවට කපාගන්න. බෝංචි දිගට ඇල අතට කපා ගන්න. ළූණු, ගෝවා ලොකු කැබලි ලෙස දිග අතට කපා ගන්න.
අඩිය නොඇලෙන පෑන් එකක් ලිප තබා තෙල් ටික රත් වෙන්නට හරින්න.
රත් වූ තෙල් වලට ඉඟුරු,සුදුළූණු එක් කර රන්වන් පැහැ වන්නට තබා ළූණු එකතු කර ගන්න. ඉන්පසු කැරට් එක් කරන්න. අල එක් කරන්න. කැරට් හා අල තැම්බෙන විට බෝංචි එක් කරන්න. සියල්ල තෙම්පරාදු වන විට ගෝවා එක් කරන්න. රස අනුව ලුණු, ගම්මිරිස් එක් කරන්න. එළවලු හොඳින් තෙම්පරාදු වූ පසු දියකරගත් කෝන් ෆ්ලා ටික එක් කරගන්න. චොප්සි එක උකු වූ පසු සීනි එක් කර ලිපෙන් බා ගන්න. වැසීම නොකරන්න.

● චිකන් ඩෙවල්

අවශ්‍ය ද්‍රව්‍ය

•තම්බා බැදගත් චිකන් හෝ ගැඹුරු තෙලේ බැදගත් චිකන්
•තක්කාලි
•ලොකු ළූණු
•මාලු මිරිස්
•ලික්ස් දඬු කොටස
•ලීක්ස් කොළ හෝ ළූණු කොළ
•චොප් කර ගත් ඉඟුරු සුදුළූණු
•රස අනුව ලුණු, ගම්මිරිස්
•කෑලි මිරිස් මේස හැඳි 1
•මිරිස් කුඩු තේ හැඳි 1/2
•සෝයා සෝස් තේ හැඳි 2
•තක්කාලි සෝස් මේස හැඳි 1
•චිකන් ස්ටොක් හෝ දියකරගත් චිකන් කියුබ් 1
•සීනි තේ හැඳි 2/3
•තෙල් මේස හැඳි 2/3
•චිලි පේස්ට් මේස හැඳි 1
•තල තෙල් තේ හැඳි 1 - අතයාවශ්‍ය නොවේ

තක්කාලි, ළූණු, මාලු මිරිස්, ලීක්ස් දඬු සියල්ල ලොකු කැබලි ලෙස කපා ගන්න.
තක්කාලි සෝස්, සෝයා සෝස්, චිකන් ස්ටොක්, සීනි, මිරිස් කුඩු සියල්ල එකට දිය කර ගන්න.
අඩිය නොඇලෙන පෑන් එකක් ලිප තබා තෙල් එක් කරගන්න.
තෙල් රත් වූ පසු චොප් කර ගත් ඉඟුරු සුදුළූණු එක් කරගන්න. එය රන්වන් පැහැ වන විට ළූණු එක් කරගන්න.
ළූණු තෙම්පරාදු වන විට කපා ගත් මාලු මිරිස් හා ලීක්ස් දඬු කොටස් එක් කරගන්න. තක්කාලිද එක් කර කලවම් කරගන්න.
සාදා ගත් සෝස් මිශ්‍රණය හා චිලි පේස්ට් එක් කරන්න. මිශ්‍රණය හොඳින් කලවම් කර බැදගත් චිකන් කැබලි එකතු කරන්න. රස අනුව ලුණු ගම්මිරිස් එකතු කරගන්න. ඩෙවල් එක හොඳින් උකු වූ පසු ගින්දර නිවා තල තෙල් බිංදු කීපයක් එක් කරගන්න. අවසානයේ සිහින්ව කපා ගත් ලූණු කොළ එකතු කරගන්න.

● චිලි පේස්ට්

අවශ්‍ය ද්‍රව්‍ය

•සෝදා වියලා ගත් කූනිස්සන් 100g (සෝදා කබලේ බැදගැනීමද සිදු කල හැක.
•කෑලි මිරිස් 200g
(කූනිස්සන් 1: කෑලි මිරිස් 2)
•සුදු ළූණු කුඩාවට කපාගත් මේස හැඳි 1
•ඉඟරු කුඩාවට කපාගත් මේස හැඳි 1
•ලොකු ළූණු ගෙඩියක් කුඩාවට කපාගෙන
•තෙල් කෝප්ප 1

සෝස් සඳහා

•සියඹලා බික් 3-4
•සීනි මේස හැඳි 2
•සෝයා සෝස් මේස හැඳි 2
•රස අනුව ලුණු

සෝයා සෝස් වලට සීනි හා සියඹලා එක් කර හොඳින් දියකර ගන්න. එයටම ලුණුද එක් කරන්න.
තෙල් ටික පෑන් එකක දමා රත් කර ගන්න.
එයට සුදු ළූණු, ඉඟුරු, ළූණු එක් කර බැදෙන්න හරින්න. හොඳින් බැදුණු පසු එයට කූනිස්සන් එක් කර මදක් බැදෙන්න හරින්න. එයටම කෑලි මිරිස්ද එක් කර කලවම් කරමින් තෙල් වල බැදෙන්න හරින්න.
සදාගත් සෝස් එක එක් කර හොඳින් කලවම් කර ගන්න. රස අනුව අවශ්‍ය නම් සීනි ලුණු එක් කරගන්න.
තෙත ගතිය නැතිවී තෙල් පෑදුණු පසු ලිපෙන් ඉවත්කර ගන්න.

සියල්ල උණුසුම්ව පිළිගන්වන්න.

© kalSwijesooriya @ KC & Baby K

Chilli Paste - චිලි පේස්ට්

අවශ්‍ය ද්‍රව්‍ය
•සෝදා වියලා ගත් කූනිස්සන් 100g (සෝදා කබලේ බැදගැනීමද සිදු කල හැක.
•කෑලි මිරිස් 200g
(කූනිස්සන් 1: කෑලි මිරිස් 2)
•සුදු ළූණු කුඩාවට කපාගත් මේස හැඳි 1
•ඉඟරු කුඩාවට කපාගත් මේස හැඳි 1
•ලොකු ළූණු ගෙඩියක් කුඩාවට කපාගෙන
•තෙල් කෝප්ප 1

සෝස් සඳහා
•සියඹලා බික් 3-4
•සීනි මේස හැඳි 2
•සෝයා සෝස් මේස හැඳි 2
•රස අනුව ලුණු

සෝයා සෝස් වලට සීනි හා සියඹලා එක් කර හොඳින් දියකර ගන්න. එයටම ලුණුද එක් කරන්න.

සාදා ගන්නා ආකාරය
තෙල් ටික පෑන් එකක දමා රත් කර ගන්න.
එයට සුදු ළූණු, ඉඟුරු, ළූණු එක් කර බැදෙන්න හරින්න. හොඳින් බැදුණු පසු එයට කූනිස්සන් එක් කර මදක් බැදෙන්න හරින්න. එයටම කෑලි මිරිස්ද එක් කර කලවම් කරමින් තෙල් වල බැදෙන්න හරින්න.
සදාගත් සෝස් එක එක් කර හොඳින් කලවම් කර ගන්න. රස අනුව අවශ්‍ය නම් සීනි ලුණු එක් කරගන්න.
තෙත ගතිය නැතිවී තෙල් පෑදුණු පසු ලිපෙන් ඉවත්කර ගන්න.

Banana-Oats Pancake

අවශ්‍ය ද්‍රව්‍ය
•ඉදුණු කෙසෙල් (වැඩිපුර ඉදුණු කෙසෙල් වඩාත් සුදුසුයි) ගෙඩි ලොකු 2/පොඩි 4
•බිත්තර 1
•දුඹුරු සීනි මේස හැඳි 4
•තෙල් වර්ගයක්/ දියකරගත් බටර් මේස හැඳි 1
•තිරිඟු පිටි මේස හැඳි 3
•ඕට්ස් මේස හැඳි 2
•වැනිලා තේ හැඳි 1
•බේකින් පවුඩර් තේ හැඳි 1
•දියර කිරි මේස හැඳි 3-4

සාදන ආකාරය
ඉදුණු කෙසෙල් හොඳින් පොඩිකර ගන්න.

සීනි, දියකර ගත් බටර් හෝ තෙල්, එකට ගසා ගන්න. බිත්තරය එක් කර ගසා ගන්න. එයට පොඩිකර ගත් කෙසෙල් එක් කර, සීනි දියවන තුරු මිශ්‍රණය ගසාගන්න.
තිරිඟු පිටි එකට බේකින් පවුඩර් එක් කර හලා ගන්න. එයටම ඕටිස් එක් කර කලවම් කර ගන්න.
සකස් කරගත් තෙත් මිශ්‍රණය හා වියලි මිශ්‍රණය එකට එකතු කරන්න.
දියර කිරි එක් කරමින් දියරමය නමුත් ඝනකම් (වැක්කෙරන සුලු) මිශ්‍රණයක් සකස් කරගන්න. අවසානයේ මිශ්‍රණයට වැනිලා එක් කරගන්න.

පෑන් එකක් ලිප තබා තෙල් හෝ බටර් ස්වල්පයක් එක් කරගන්න. රත් වූ පසු මිශ්‍රණයෙන් මේස හැඳි දෙකක් පෑන් එක මැදට එක් කරන්න. හැන්ද භාවිතයෙන් තුනී කිරීම අවශ්‍ය නොවේ. මද ගින්නේ පෑන් කේක් එක පුලුස්සා ගන්න. එවිට පෑන් කේක් එක මතුපිට බුබුලු සෑදී පිපිරී යයි. එසේ බුබුලු සෑදීම නැවතුනු පසු පෑන් කේක් එක අනෙක් පස හරවා පුලුස්සා ගන්න.

පැණි වර්ගයක්, බටර්, චොක්ලට් තැවරුමක්, අයිසින් සීනි ආදි කැමති දෙයක් සමඟ ආහාරයට ගන්න.

© kalSwijesooriya @ KC & Baby K

Bread Pudding - පාන් පුඩිම

1 වන ලේයර් එක

අවශ්‍ය ද්‍රව්‍ය 

දවසක් පරණ පාන් පෙති 6-7
කිරි කෝප්ප 1 (250ml)
බිත්තර ලොකු 2
සීනි කෝප්ප 1/2 (50g)
බටර් 50g
වැනිලා තේ හැඳි 1
සාදික්කා කුඩු ස්වල්පයක්
කුරුඳු කුඩු ස්වල්පයක්

පාන් පෙති 4ට කපා පැත්තකින් තබා ගන්න.

කිරි හා සීනි පෑන් එකකට දමා, ලිප මත තබා, මද ගින්නේ රත් කරගන්න. සීනි දියවූ පසු එයට බටර්ද එක් කර දිය කර ගන්න. කිරි උතුරා ඒමට පෙර මිශ්‍රණය ලිපෙන් ඉවත් කරගෙන, හොඳින් නිවා ගන්න.
ලොකු බඳුනකට බිත්තර එක් කර ගසා ගන්න. එයටම නිවාගත් කිරි මිශ්‍රණයද එක් කර හොඳින් ගසා ගන්න. වැනිලා, සාදික්කා කුඩු, කුරුඳු කුඩු එක් කර නැවත ගසා ගන්න.
කිරි මිශ්‍රණය ට කපාගත් පාන් පෙති එක් කර පෙඟෙන්නට හරින්න. (විනාඩි 15ක් පමණ)

2 වන ලේයර් එක

අවශ්‍ය ද්‍රව්‍ය 

රම් එසන්ස් ස්වල්පයක්
ප්ලම්ස් 50g
සීනි තේ හැඳි 1
මද උණුසුම් වතුර ස්වල්පයක්

සීනි ටික වතුරේ දියකර ගෙන එයට රම් එසන්ස් ස්වල්පයක් එක් කරගන්න. එයට ප්ලම්ස් එක් කර පියනකින් වසා පැත්තකින් තබන්න.

3 වන ලේයර් එක

අවශ්‍ය ද්‍රව්‍ය 

දොඩම් හෝ මැන්ඩරීන් පොතු
සීනි තේ හැඳි 1
වතුර තේ හැඳි 1
දෙහි යුෂ ස්වල්පයක්.

මේ සියල්ල පෑන් එකක දමා මද ගින්නේ පිස ගන්න. දොඩම් පොතු මෘදු වී වතුර සිඳුන පසු පොතු ටික වෙනම ඉවත් කරගෙන සැරසීමට භාවිතා කරන්න.

මෙසේ සකස් කරගත් පෙඟවූ පාන්, පෙඟවූ ප්ලම්ස්, දොඩම් පොතු මාරුවෙන් මාරුවට පිලිවෙලින් බඳුන තුල ලේයර් ලෙස අතුරා ගන්න. පෙඟවූ පාන් වල ඉතිරි වූ කිරි ද එයටම එක් කරන්න.

ස්ටීම් කිරීම
බඳුන පියනකින් හෝ foil එකකින් වසා විනාඩි 30ක් ස්ටීමී කරගන්න.
මදක් නිවුනු පසු පිඟානක් මත අනෙක් පස හරවා ගන්න.

© kalSwijesooriya @ KC & Baby K

Coconut Toffee - පොල් ටොෆී

අවශ්‍ය  ද්‍රව්‍ය
• ගාගත් පොල් 400g  (කුරුටු එක් නොවන ලෙස)
• සුදු සීනි 600g
(පොල් 1 : සීනි 1 1/2)

• වැනිලා තේ හැඳි 1
• ගාගත් දෙහි ලෙල්ල හා දෙහි යුෂ ස්වල්පයක් (කැමති නම්)
• ආහාර වර්ණකයක් කැමති වර්ණයකින්
• කුඩු කරගත් එනසල් ස්වල්පයක්
• කෑලි කැපීම සඳහා බටර් ගාගත් තැටියක්

ගාගත් පොල් හා සීනි අඩිය නොඇලෙන බඳුනකට දමා ලිප මත මද ගින්නේ තබාගන්න.
මේ අවස්ථාවේ සිට මිශ්‍රණය ලිපෙන් බා ගන්නා අවස්ථාව දක්වාම නොනවත්වා හැඳිගෑම කලයුතු බැවින් මේ සඳහා පැතලි ලී හැන්දක් භාවිතා කිරීම පහසුයි.
මුලින් සීනි දියවී, පොල් හා එක් වී ජලය පෑදීම සිදු වේ. මද ගින්නේ විනාඩි 10ක් පමණ හැඳිගාන විට ජලය සිඳී, මිශ්‍රණය එකට ඇලීම ඇරඹේ.
මේ අවස්ථාවේදී වැනිලා, එනසාල් හා වර්ණක එක් කරන්න.
වර්ණය ඒකකාරීව පැතිර යන ලෙස දිගටම හැඳි ගාන්න.
ගාගත් දෙහි පොතු හා යුෂ ස්වල්පයද එක් කරගන්න.
දිගටම හැඳි ගාන්න. හැන්ඳ බඳුනේ පතුල ස්පර්ශ වන ලෙස හැඳිගෑම කලයුතුයි.

පදම
මිශ්‍රණය හැන්ඳෙන් අනික් පස හරවමින් තුනී කරන විට සුදු පැහැයෙන්, කෑලී වෙන් වෙමින්, වියලි ඇති බව පෙනේ නම් පදම නිවැරදි වේ. මේ අවස්ථාවේදී මුලු මිශ්‍රණයම එක් ගුලියක් බවට පත් වීමද සිදුවේ.

මෙසේ නිසි පදම පැමිණි පසු මිශ්‍රණය ලිපෙන් බාගෙන, බටර් ගා පෙර සූදානම් කර ගත් තැටියට දමා, අවශ්‍ය පරිදි හොඳින් තුනී කරගන්න. මේ සඳහා කෙසෙල් කොළයක්, පැතිලි පිහියක්/flat knife, පැතලි හැන්දක් යොදාගත හැකියි.
රස්නය තිබියදීම කෑලි කැපීම සඳහා සලකුණු කර ගැනීම අවශ්‍ය වේ.

මදක් නිවුණු පසු කෑලී වෙන්කර කනපිට හරවා ද නිවා ගන්න.

© kalSwijesooriya @ KC & Baby K

Caramel Pudding - කැරමල් පුඩින්

අවශ්‍ය ද්‍රව්‍ය

• බිත්තර ලොකු 4
• කිරි 250ml
• දුඹුරු සීනි කෝප්ප 1
• එනසහල් 5
• වැනිලා තේ හැදි 1

කැරමල් සඳහා
දුඹුරු සීනි මේස හැඳි 4 - පුරවා

සාදන ආකාරය

කැරමල්
තෝරාගත් බදුනකට සීනි මේස හැඳි 4 අඩිය වැසෙන පරිදි එක් කර, මදගින්නේ රත් වීමට ඉඩහරින්න. (අවශ්‍ය නම් වතුර මිස හැන්දක් එක් කරන්න.) සීනි දිය කරගැනීම සඳහා කිසිවිටකත් හැන්ද භාවිතා නොකල යුතුයි. අවශ්‍ය නම් බඳුන කරකවමින් සීනි දිය කරගන්න. එසේ දිය වූ සීනි තද රතු-දුඹුරු පැහැ වන තුරු කර වීමට ඉඩ හරින්න. බඳුන කරකවමින් සීනි ඒකාකාරව කැරමල් කරගන්න. බඳුන ලිපෙන් ඉවත් කර කරකවමින් වටේටම කැරමල් තවරා ගන්න. පුඩින් සෑදීමට වෙනත් බදුනක් යොදාගන්නේ නම් ඊට පෙර එම බදුනට කැරමල් එක් කර මෙම පියවල කිරීමට වගබලා ගන්න.

පුඩින් එක
මුලින්ම කිරි 250ml ට සීනි කෝප්ප 1 එක් කර මද ගින්දරේ සීනි දියවන තුරු රත් කරන්න. කිරි නැටවීම අවශ්‍ය නොවේ.
බිත්තර 4 බ්ලෙන්ඩර් කප් එකට එක්කර ගන්න. (සුදුමද කහ මද සියල්ල)
එයටම නිවාගත් සීනි කිරි මිශ්‍රණයද එක් කර, වැනිලා සහ කුඩු කරගත් එනසහල් ද එක් කරගන්න.
බ්ලෙන්ඩරයේ පළමු වේගයෙන් විනාඩියක් පමණ මිශ්‍රණය ගසා ගන්න.
පසුව කැරමල් තවරාගත් බඳුනට මිශ්‍රණය පෙරා එක් කරගන්න.

ස්ටීම් කිරීම.
මිශ්‍රණය එක් කරගත් බඳුන පියනකින් හෝ ෆොයිල් එකකින් හොඳින් ආවරණය කරගන්න.
පසුව විනාඩි 30ක් ස්ටීම් කර ගන්න. (Instant pot/ electric pressure cooker/ rice cooker එකක් භාවිතා කල හැක.)
විනාඩි 30කට පසු ටූත් පික් එකක් ආධාරයෙන් පුඩින් එක තැම්බී ඇද්දයි බලා ලිපෙන් බාගන්න.
මදක් නිවුනු පසු බදුන මතට පිඟානක් වසා අනෙක්පස හරවාගන්න.

© kalSwijesooriya @ KC & Baby K